Një postim i fundit i regjisorit dhe komentatorit politik serb Boris Malagurski, në të cilin sugjerohej se Danimarka kishte tërhequr njohjen e pavarësisë së Kosovës, ka shkaktuar reagime të shumta dhe është cilësuar si dezinformim i qëllimshëm në rrjetet sociale.
Malagurski publikoi një imazh që dukej si një artikull nga “CNN Politics”, duke pretenduar se Danimarka i kishte kërkuar falje Serbisë dhe kishte revokuar njohjen e Kosovës si shtet i pavarur.
Imazhi ishte i dizajnuar në mënyrë profesionale, me logon e CNN-së dhe formatim tipik të mediave ndërkombëtare, duke krijuar përshtypjen e një lajmi autentik.
Pas reagimeve të shumta, Malagurski shtoi një shënim sqarues duke thënë se “artikulli” ishte i sajuar dhe se postimi kishte për qëllim të ilustronte atë që, sipas tij, Danimarka “duhet” të bënte. Megjithatë, ekspertë të mediave theksojnë se ky sqarim nuk e zhbën ndikimin fillestar të dezinformatës, e cila tashmë kishte qarkulluar gjerësisht dhe ishte marrë si fakt nga një pjesë e audiencës.
Analistët e konsiderojnë këtë si një shembull tipik të manipulimit vizual, ku përmbajtja e rreme paraqitet në formë të besueshme për të gjeneruar reagime emocionale dhe përhapje virale, ndërsa mohimi ose relativizimi vjen vetëm pasi dezinformata ka prodhuar efektin e saj.
Rasti ka rikthyer vëmendjen edhe mbi aktivitetin e mëparshëm të Malagurskit në lidhje me Kosovën. Ai njihet për qëndrime që minimizojnë krimet serbe gjatë luftës dhe për paraqitjen e shtetësisë së Kosovës si një “precedent të rrezikshëm”, duke përdorur narrativa që përputhen me qëndrimet zyrtare të Beogradit.
Autoritetet e Kosovës e kanë shpallur Malagurskin person non grata, duke vlerësuar se aktivitetet e tij janë të dëmshme dhe destabilizuese për rendin kushtetues dhe sovranitetin e vendit.
Sipas ekspertëve të komunikimit, ky rast ilustron mënyrën se si përmbajtja sensacionale dhe imazhet e fabrikuara po përdoren gjithnjë e më shpesh si mjete të propagandës moderne. Këto teknika synojnë të ndikojnë opinionin publik ndërkombëtar, duke manipuluar perceptimin përmes pamjeve bindëse dhe titujve të fortë, pa mbështetje faktike.
Postimi i Malagurskit, sipas këtyre vlerësimeve, nuk shihet si një incident i izoluar, por si pjesë e një modeli më të gjerë dezinformimi që synon të minojë legjitimitetin e shtetit të Kosovës në arenën ndërkombëtare./Gardiani.
