Në Gjykatën Speciale në Hagë, të mërkurën më 11 shkurt, ka vazhduar seanca me deklaratat përmbyllëse të mbrojtjes së ish-presidentit të Kosovës, Hashim Thaçi, ndërsa më pas fjalën e nisi edhe mbrojtja e ish-kryeparlamentarit Kadri Veseli.
Mbrojtja e Thaçit: S’ka pasur ndërmarrje të përbashkët kriminale
Avokatja Nina Tavakoli kundërshtoi pretendimet e Zyrës së Prokurorit të Specializuar (ZPS) se Thaçi kishte dijeni për krimet e kryera në verën e vitit 1999 dhe nuk kishte vepruar për t’i parandaluar apo ndëshkuar ato.
Sipas saj, përgjegjës për ndjekjen e krimeve në atë periudhë ishte UNMIK-u, ndërsa Thaçi, si kryeministër i Qeverisë së përkohshme, kishte rol të kufizuar. Tavakoli tha se ai kishte bërë thirrje publike për tolerancë dhe u kishte kërkuar serbëve të mos largoheshin nga Kosova, duke shtuar se kjo e kishte ekspozuar atë ndaj rreziqeve personale dhe politike.
Ajo theksoi se vazhdimi i dhunës, pavarësisht thirrjeve për qetësi, dëshmon se Thaçi nuk kishte kontroll efektiv mbi kryerësit e veprave.
Prosper: Prokuroria tregoi mungesë respekti ndaj dëshmitarëve
Avokati Pierre-Richard Prosper kritikoi ZPS-në për trajtimin e shtatë dëshmitarëve ndërkombëtarë të mbrojtjes, duke thënë se Prokuroria ka treguar “arrogancë” dhe mungesë respekti ndaj figurave që kishin përfaqësuar SHBA-në, NATO-n dhe OKB-në.
Në mesin e dëshmitarëve të mbrojtjes ishin ish-ndihmës sekretari amerikan i Shtetit James Rubin, gjenerali amerikan në pension Wesley Clark dhe diplomati Christopher Hill.
Sipas Prosperit, këta dëshmitarë kanë deklaruar se UÇK-ja nuk kishte komandë dhe kontroll efektiv, se Thaçi nuk ishte përgjegjës për krimet e pretenduara dhe se konflikti i armatosur kishte përfunduar në qershor 1999.
Ai kundërshtoi pretendimin e Prokurorisë se Thaçi kishte mashtruar zyrtarë të lartë ndërkombëtarë, duke e cilësuar këtë si të pabesueshme.
Mishetiq: ZPS kërkon dënim që nënkupton burgim të përjetshëm
Kryembrojtësi i Thaçit, Lluka Mishetiq, deklaroi se Prokuroria nuk ka vërtetuar ekzistencën e një “ndërmarrjeje të përbashkët kriminale” (NPK) dhe nuk ka dëshmuar se si Thaçi ka kontribuar në krimet e përfshira në aktakuzë, përfshirë vrasje dhe ndalime të paligjshme.
Ai tha se klienti i tij ka qëndruar jashtë vendit për pjesën më të madhe të periudhës që mbulon aktakuza.
Mishetiq kritikoi kërkesën e ZPS-së për dënim me nga 45 vjet burgim për secilin prej katër të akuzuarve, duke thënë se kjo në praktikë përbën “burgim të përjetshëm” dhe nuk bazohet në praktikat e mëparshme gjyqësore.
Sipas tij, Thaçi duhet të shpallet i pafajshëm dhe të lirohet.
Mbrojtja e Veselit: “Nuk ekziston asnjë provë”
Pas përfundimit të deklaratave të mbrojtjes së Thaçit, fjalën e nisi mbrojtja e Kadri Veselit.
Avokati Rodney Dixon e cilësoi çështjen kundër Veselit si “përpjekje për të gjetur njëbrirëshin”, duke argumentuar se për më shumë se pesë vjet hetime, Prokuroria nuk ka gjetur asnjë provë për përfshirjen e tij në veprimtari penale.
Ai tha se Veseli ishte anëtar i përkushtuar i UÇK-së dhe se pjesëmarrja në të nuk përbën krim. Sipas Dixonit, asnjë dëshmitar në gjykatë nuk e ka lidhur Veselin me ndonjë vepër penale të përmendur në aktakuzë.
Mbrojtja argumentoi se provat e paraqitura nga ZPS janë dytësore, të pavërtetuara dhe të bazuara në dëshmi që nuk janë testuar përmes kundërpyetjes.
Dixon shtoi se veprimet legjitime për çlirimin e Kosovës nuk mund të shndërrohen në “ndërmarrje të përbashkët kriminale”.
Deklaratat përmbyllëse të mbrojtjes së Veselit do të vazhdojnë edhe në seancën e radhës në Gjykatën Speciale në Hagë./Gardiani.
