Portali serb Novosti publikoi një artikull me titull: “Në Shkodër filloi takimi trilateral KUNDËR SERBËVE: Shqipëria, Prishtina dhe Kroacia për bashkëpunim ushtarak”, duke lënë të kuptohet se takimi i përfaqësuesve të ministrive të mbrojtjes të tre vendeve është i orientuar kundër serbëve.
Verdikti: Dezinformatë / Manipulim me titullin
Analiza:
Takimi i zhvilluar në Shqipëri është pjesë e implementimit të Deklaratës trilaterale për bashkëpunim në fushën e mbrojtjes, e nënshkruar në vitin 2025 në Tiranë nga Shqipëria, Kosova dhe Kroacia.
Dokumenti zyrtar nuk përmban asnjë referencë që marrëveshja apo takimet pasuese janë të orientuara kundër Serbisë apo kundër ndonjë populli tjetër. Përkundrazi, deklarata fokusohet në:
- forcimin e bashkëpunimit ushtarak,
- zhvillimin e ushtrimeve dhe trajnimeve të përbashkëta,
- rritjen e interoperabilitetit mes forcave të armatosura,
- kontributin për stabilitetin dhe sigurinë rajonale.
Në tekstin e publikuar të Deklaratës theksohet se Shqipëria dhe Kroacia marrin pjesë si vende anëtare të NATO-s, ndërsa Kosova si partnere në kuadër të bashkëpunimit rajonal, me synim përmbushjen e obligimeve të përbashkëta të sigurisë dhe standardeve të interoperabilitetit.
Asnjë pjesë e dokumentit nuk përmend Serbinë si objektiv, kërcënim apo palë kundërshtare.
Ndërkohë, media të tjera rajonale dhe ndërkombëtare kanë raportuar për takimin pa përdorur korniza sensacionale apo narrativë konfrontuese, duke e paraqitur atë si pjesë të bashkëpunimit të rregullt në fushën e mbrojtjes.
Çfarë bën Novosti?
Duke përdorur formulimin “KUNDËR SERBËVE” me shkronja të mëdha në titull, portali krijon një narrativë konfrontuese që nuk mbështetet në dokumente zyrtare. Kjo përbën manipulim përmes titullit (clickbait) dhe kornizim të qëllimshëm për të nxitur tensione etnike dhe politike.
Përfundim:
Takimi trilateral Shqipëri–Kosovë–Kroaci është pjesë e një marrëveshjeje bashkëpunimi në fushën e mbrojtjes dhe sigurisë rajonale. Nuk ka asnjë provë që ai është i orientuar “kundër serbëve”, siç pretendon Novosti. Pretendimi i portalit nuk mbështetet në fakte dhe përbën dezinformim përmes interpretimit të njëanshëm./Gardiani.
