Kryeministri në detyrë i Kosovës, Albin Kurti, ka deklaruar të premten para mediave se Kosova dëshiron të kontribuojë për paqen kudo në botë ku ka nevojë, duke komentuar pjesëmarrjen e Kosovës në Bordin e Paqes, një nismë e presidentit amerikan Donald Trump, në kuadër të planit për rindërtimin e Rripit të Gazës të shkatërruar nga lufta.
Sipas Kurtit, përfshirja e Kosovës në këtë mekanizëm ndërkombëtar përfaqëson vazhdimësinë e angazhimit të saj në përpjekjet globale për paqe dhe stabilitet.
Përmes Bordit të Paqes, Shtetet e Bashkuara të Amerikës synojnë të ndërmjetësojnë dhe të kontribuojnë në zgjidhjen e konflikteve globale, përfshirë situatën në Gazë.
Duke folur për herë të parë publikisht për këtë bord, Kurti theksoi se pjesëmarrja e Kosovës është e lidhur drejtpërdrejt me kontributin e saj në kuadër të Forcës Ndërkombëtare Stabilizuese, ku Kosova ka qenë e angazhuar përmes Forcës së Sigurisë së Kosovës (FSK). Ai përmendi në veçanti rolin e komandantit të FSK-së, gjeneral-lejtnant Bashkim Jashari, duke nënvizuar kapacitetet profesionale të kësaj force.
“FSK-ja është e mirënjohur tashmë për kërkim-shpëtim dhe për deminim, por jo vetëm”, ka deklaruar Kurti, duke shtuar se përvoja e Kosovës në misione të tilla e bën atë një partnere të besueshme në iniciativa ndërkombëtare të paqes.
Kryeministri në detyrë iu referua gjithashtu pjesëmarrjes së FSK-së në një konferencë të mbajtur në dhjetor të vitit 2025 në Doha të Katarit, të organizuar nga Komanda Qendrore e Shteteve të Bashkuara, ku u diskutua formimi dhe funksionimi i Forcës Ndërkombëtare Stabilizuese për Gazën.
“Prandaj kemi qenë të interesuar të marrim pjesë edhe në organet vendimmarrëse politike”, ka thënë Kurti, duke lënë të kuptohet se Kosova synon të ketë rol aktiv jo vetëm në terren, por edhe në proceset politike që lidhen me paqen dhe stabilitetin.
Forca Ndërkombëtare Stabilizuese dhe plani për Gazën
Forca Ndërkombëtare Stabilizuese parashihet të jetë një forcë paqeruajtëse shumëkombëshe, me mandat të Kombeve të Bashkuara, e cila do të formohet në bazë të planit 20-pikësh të presidentit amerikan Donald Trump për paqe në Gazë.
Ky plan, sipas burimeve ndërkombëtare, është pranuar nga Izraeli dhe Hamasi – organizatë e shpallur terroriste nga Shtetet e Bashkuara dhe fuqitë e tjera perëndimore – në tetor të vitit 2025.
Megjithëse detajet për mandatin dhe përbërjen e kësaj force ende nuk janë bërë publike në tërësi, besohet se Forca Ndërkombëtare Stabilizuese do të ketë përgjegjësi për ofrimin e sigurisë dhe për mbikëqyrjen e zbatimit të marrëveshjes së armëpushimit në Rripin e Gazës.
Shtëpia e Bardhë ka njoftuar se komandanti i kësaj force është emëruar gjeneralmajori i ushtrisë amerikane, Jasper Jeffers, i cili aktualisht shërben si komandant i operacioneve speciale të SHBA-së.
Kurti ka theksuar se një ndër arsyet kryesore pse Kosova po angazhohet në iniciativa të tilla ndërkombëtare është përvoja e saj historike si vend përfitues i paqes përmes ndërhyrjes së forcave ndërkombëtare.
“Sa i përket Gazës, ju e dini që ne i kemi ndarë gjysmë milioni euro si Qeveri dhe ky është proces i cili do të vazhdojë edhe në vijim”, ka deklaruar ai.
Bordi i Paqes dhe roli i Kosovës
Bordi i Paqes është themeluar më 22 janar në Davos të Zvicrës, në praninë e presidentit amerikan Donald Trump, dhe synon të mbikëqyrë udhëheqjen dhe tranzicionin politik të Rripit të Gazës në periudhën pas konfliktit. Kosova në këtë ngjarje është përfaqësuar nga presidentja Vjosa Osmani.
Lufta mes Izraelit dhe Hamasit ka nisur në tetor të vitit 2023, pasi Hamasi vrau mbi 1.200 persona në Izrael dhe mori qindra pengje.
Si kundërpërgjigje, operacionet ushtarake izraelite në Gazë kanë shkaktuar mijëra viktima, krizë të thellë humanitare dhe shkatërrime të mëdha të infrastrukturës.
Në këtë kontekst, autoritetet kosovare vlerësojnë se angazhimi në Bordin e Paqes dhe në Forcën Ndërkombëtare Stabilizuese përbën një kontribut të drejtpërdrejtë të Kosovës në përpjekjet ndërkombëtare për paqe, siguri dhe rindërtim pas konfliktit.
